Joan den larunbatean San Mamesen azken partida Barcelonaren aurka jokatuta, bukaera eman dio Athleticek denboraldiari. Katalanen aurrean lortutako garaipenak ezin izan ditu, hala ere, zaletuen ezinegona eta haserrea ezkutatu, eta hori erakutsi nahian, zapi zuri asko ikusi ziren lehengoan futbol zelaian. Lamikiz presidenteak eta zuzendaritza taldekoek badaukate, eduki ere, zer pentsaturik eta zer aldaturik hurrengo denboraldiari begira. Saioaren hasieran horretaz jardun dute Izaskun Larrabeiti eta Jose Antonio Torre Altonaga gure forofogoitiek. Biharamunean Galesko eta Euskal Herriko selekzioek elkarren aurka jokatutako partida ere erabili dute mintzagai. Haien ustez, ez dago dudarik data hainbestetan aldatu izanak jendearen erantzun eskasa baldintzatu duela. Hortik Italiako Giroa aipatzera pasatu dira eta, azkenik, Juan Martinez de Irujok Belokiren kontrako norgehiagokan egindako joko erakustaldi bikaina komentatu dute. Saioa deskargatzeko, klikatu HEMEN.

Entzun: