North Mississippi Allstars hirukoteak hilaren 13an Bilboko Kafe Antzokian kontzertua emango duela eta, ordubete pasatxoko tartea eskaini die Pedro Elias Igartuak irratsaioaren bigarren zatian. Horretara baino lehen, heriotza eta tragedia aipagai dituen Little Musgrave balada tradizionala entzun dugu Christy Mooreren ahots garbi, dotore eta landuan. Gero, Van Morrisonek Hank Williamsek 40ko hamarkadan famatu zuen kanta bat gogorarazi digu, My Bucket´s Got A Hole In It (Nire pertzak badauka zulo bat barruan), bere azken diskoan agertzen dena. Entzule baten eskariz, dagoeneko 67 urte dituen Judy Collinsek How Can I Keep from Singing (Zergatik utzi behar ote diot kantatzeari?) errepikatu digu. Hegoaldeko rocka egiten duten Drive By Truckers taldekoak etorri dira gero, A Blessing And A Curse (Bedeinkapen bat eta madarikazio bat) diskoa aurkezteko. Bestalde, Michael Nyman musikariak The Libertine (Gizon libertinoa) filmerako egindako soinu banda ezagutu dugu; Rochester konde errepublikazalearen bizitza azaltzen da bertan. Monografikoari James Luther Dickinsonen ibilbide musikala errepasatuz eman dio hasiera Pedrok. Semeek aitak urratutako bideari jarraitu eta hark amestutako proiektua gauzatu dute North Mississippi Allstars taldearen baitan. Berauen sei diskoetatik kanta bana entzun dugu saioaren azken atalean. Saioa deskargatzeko, klikatu HEMEN.

Entzun: